Esposizioan erakusten den dokumentu-multzoari esker (testuzkoak eta figuratiboak), lehenik Iruñeko Erresumak eta gero Nafarroako Erresumak historiako bi garaitan izan dituen mugak ezagutzeko aukera izanen da: Erdi Arokoak (garai nahasia izan zen) eta Aro Modernokoak (egonkorragoa lurraldearen aldetik, baina barne-eraldaketa sakonak izan ziren). Dokumentuek erakusten dute espazioaren eta mugen pertzepzioak zer-nolako aztarna utzi zuten testigantza idatzietan, eta historialariek iragana ezagutzeko oinarritzat hartzen dituzten iturri historikoen aniztasunaren berri ematen dute.

Bestalde, erresumak une bakoitzean bizi izan zuen egoera jasotzen duten mapa batzuk prestatu dituzte; horretarako, historiako hamahiru une gogoangarri hartu dira kontuan, eta tamaina handiko karpeta batean aurkeztu dira, eskoletan eta helburu didaktikoetarako erabiltzeko; erakusketaren katalogoa ere eskura dago.